O Concello de Castrelo de Miño fai saber que  redactou o proxecto do Obradoiro de Emprego “Castrelo Náutico” e presentouno á orde de axudas do 30 de decembro de 2008, publicado no DOG Nº 9 de 2009, pola que se establecen as bases reguladoras das axudas e subvencións para os programas de obradoiros de emprego na súa convocatoria para o ano 2009.

• QUE SON OS OBRADOIROS DE EMPREGO?:

Os obradoiros de emprego concíbense como programas mixtos de formación e emprego que están dirixidos a mellorar a ocupabilidade das persoas desempregadas a través da súa cualificación profesional en alternancia coa adquisición de experiencia laboral mediante a realización de obras ou a prestación de servizos de utilidade pública ou interese social. Os obradoiros tamén ofrecen aos seus alumnos orientación e asesoramento laboral, educación compensatoria nos casos de non finalización da ESO, módulos de seguridade e saúde no traballo, de sensibilización medioambiental e de igualdade de xénero.

• A QUEN VAI DIRIXIDO?:

O obradoiro de emprego está destinado a persoas desempregadas maiores de 25 anos. Combinan a formación co emprego e ten unha duración de 12 meses. Os traballadores e traballadoras desta modalidade reciben un salario de 936 euros ao mes.

• O OBRADOIRO DE CASTRELO DE MIÑO: “CASTRELO NÁUTICO”:

O 21 de outubro de 2009 a Consellería de Traballo e Servizos Sociais en escrito dirixido ao alcalde do Concello de Castrelo de Miño comunicáballe que o obradoiro de emprego Castrelo Náutico redactado polo Concello de Castrelo fora aprobado. Os alunos-traballadores que se van ver beneficiados serán un total de 25, repartidos nos 3 módulos, xunto co persoal directivo, administrativo e docente que sexa necesario. O investimento total coa aportación municipal suporá un importe total de 583.405 euros.

O obradoiro de emprego “Castrelo Náutico”, o primeiro obradoiro de emprego que se vai realizar no Concello de Castrelo de Miño, consta de tres módulos: Axuda no Fogar, Servizos Náuticos e Restauración de zonas degradadas e áreas Termais.

1.) AXUDA NO FOGAR: (CONTRATACIÓN DE 8 ALUNOS-TRABALLADORES/AS)

Este módulo formúlase como unha solución á problemática que cada vez mais se manifesta nos concellos do rural que contan cunha poboación cada vez mais envellecida e dependente, como é o caso do Concello de Castrelo de Miño, onde un 40% dos nosos veciños ten un idade superior a 65 anos.

O que se busca con este módulo é formar ás persoas participantes no desempeño das tarefas e actividades relacionadas coa atención a persoas en situación de dependencia no seu domicilio a fin de mellorar a súa calidade de vida, tentando prolongar o máximo posible o ingreso en centros para maiores lonxe das súas casas, e facilitando a labor das familias que teñen persoas dependentes ao seu cargo.

2.) SERVIZOS NÁUTICOS (CONTRATACIÓN DE 8 ALUNOS-TRABALLADORES/AS):

Uns dos principais reclamos turísticos cos que conta o concello de Castrelo de Miño é o Complexo de turismo Náutico onde se desenvolven gran número de competicións deportivas náuticas de ámbito nacional e internacional. O principal obxectivo deste obradorio é dotar dos coñecementos teóricos aos alunos-traballadores no referente ao arranxo das embarcacións de recreo e deportivas que se usan de xeito habitual no Complexo de Turismo Náutico.

Neste mesmo obradorio e coa finalidade de que a formación adquirida sexa a maior posible no ámbito da náutica desenvolverían a aplicación práctica dos coñecementos impartidos nas clases teóricas como serian o arranxo dos antigos pantaláns onde deberían aplicar as técnicas de flotabilidade e a composición de estruturas de madeira. A idea é reporlle o seu sistema de flotación e reconstruír todos os elementos de madeira xa que as súas estruturas metálicas encóntranse en perfecto estado o que fai desta obra una actividade moi rendible, ademais de xerar persoas cunha actividade de forte perspectiva laboral. Tamén ten por obxectivo recuperar unha serie de elementos que hoxe atópanse desafectados do seu uso.

E finalmente para comparar os avances experimentados neste ámbito e co fin de non esquecer a tradición existente na zona do río Miño contemplase a recuperación dunha antiga actividade que é a construción de barcas de río de madeira, tan tradicionais nos territorios bañados polo río Miño. Isto preténdese facer seguindo as antigas artes e tradicións de construción e utilizando os mesmos materiais e ferramentas; Podendo isto nun futuro recuperar a costume de cruzar en barca o río, actividade de gran potencialidade turística e etnográfica.

Todas estas actividades xerarán un caudal de persoas especializadas con un gran potencial laboral para un próximo futuro no complexo de turismo náutico de Castrelo de Miño, onde se necesitarán estes profesionais para desenrolar estas tarefas de mantemento das embarcacións e das actividades náuticas.

3.) RESTAURACIÓN DE ÁREAS DEGRADADAS E ZONAS TERMAIS. (CONTRATACIÓN DE 9 ALUNOS -TRABALLADORES/AS)

A.) RUTA DE SENDEIRISMO: A finalidade deste obradoiro será a realización dunha ruta de sendeirismo para unir as antigas pozas termais do pobo de Santa María coas de nova construción na zona de Paradela.

O atractivo deste percorrido atópase non só na beleza paisaxística senón tamén no atractivo turístico da zona ao contar a seu paso cunha das zonas mais dinámica do concello onde se atopan as piscinas municipais, o Complexo de Turismo Náutico, a aula de Dinamización da Sociedade da Información…. e tamén cunha das zonas mais tradicionais do concello onde se enclavan antigas construcións como pazos e casas tradicionais así como a Igrexa de Santa María de Castrelo de Miño, ben de interese cultural.

B) POZAS TERMAIS: Outra das iniciativas que se contemplan como máis innovadoras neste zona é a realización dunhas pozas termais na zona de Paradela , aproveitando as condicións naturais nas que emanan as auga naturais e que poden alcanzar unha temperatura de ata 70º centígrados. Esta zona converterase nun novo atractivo e reclamo turístico así como un novo servizo aos veciños de Castrelo de Miño.

Os interesados en optar a estes programas da Consellería de Traballo e Benestar teñen que estar empadroados en Castrelo de Miño, e teñen que estar inscritos, ou poden aínda anotarse, nas súas respectivas Oficinas de Emprego, especificamente como demandantes destas iniciativas.

Para ampliar información poden achegarse á Casa do Concello de Castrelo de Miño, onde a axente de emprego e desenvolvemento local estará ao seu dispor para ampliar información e axudalos nas xestións e trámites a realizar.

Do 16 ao 20 de Novembro, de 17:00 a 20:00 horas realizarase un curso sobre “Elaboración de Conservas Vexetais” no Salón de Actos do Albergue do Parque Náutico. As persoas interesadas en asistir deben anotarse antes do 10 de novembro. Este curso está organizado polo SLG. O contido do curso incluirá elaboración de conservas vexetais, salados, encurtidos, marmeladas, xalesas…

O  Concello de Castrelo de Miño fai saber que por razóns técnicas de mantemento, Union Fenosa procederá ó corte do acceso á Presa de Castrelo de Miño, o próximo mércores , día 4 de novembro do presente ano, entre as 08:00 horas e as 19:00 horas.

A ruta alternativa ou tránsito proposto, é o seguinte:

Acceso desde autovía A-52, con direción a Castrelo de Miño:

Tomar a Ou-406, hasta enlazar coa OU-352, para continuar pola OU-402 hasta destiño. (Sentido inverso para direción Castrelo de Miño pola Autovía A-52.)

O que se fai público para xeral coñecemento.

O 17 e o 18 de outubro terá lugar a II Edición do Open Internacional Black Bass Galicia 2009, organizado polo clube Pesca Sport Ribeiro.

O sábado 17 de outubro as actividades realizaranse no encoro e nas instalacións do complexo de turismo náutico de Castrelo de Miño.

Máis información e inscricións na web: www.pescaribeiro.es

O Concello de Castrelo de Miño fai saber no seu BANDO que a empresa Supervisión y Control, S.A., encargada da inspección técnica de vehículos, estará neste concello os días 18 e 19 de novembro co fin de pasa-las inspeccións periódicas ós vehículos agrícolas no lugar e co horario que a continuación se indican:

DÍAS: 18 e 19 de novembro de 2009.

HORARIO: mañá: de 9:00 a 13.30 horas - tarde: de 15:30 a 18 horas. Excepto ó último día, no que o horario será de 9:00 a 13:30h.

LUGAR: Explanada do edificio de turismo náutico.

Asígnarase día e hora de atención ó público, directamente na unidade móbil ou chamando ó teléfono 609.13.99.56.

Cómpre indicar que é preciso que tódolos tractores agrícolas deberán ter incorporado o dispositivo de luz xiratoria (RD 1428/2003), xa que de non o presentar serán rexeitados.